Etelässä on jo lehti puussa, mutta meilä on vielä lunta mettissä sen verran, että moottorikelkalaki pääsee kulkemhaan ainaki aamusella hangen aikhaan. Iltapäivälä alkaa lumi olla jo niin saheroa, että saattaapi kelkka jäähä kiini. On se lumi tosin kyllä vähentynykki; lasten hiekkalaatikko on jo sulanu ja pihaki alkaa olla puhas ja osittain kuivunukki jo. Ja meän soratiet on kohtuulisen kuivat, mutta äärettömän kuoppaset, niinku aina kevhäälä ja syksylä.

Varaston seinustalla maitohorsma ja koiranputki pukkaa uutta kasvua ja talon takana kattoin eilen, äitienpäivänä, että nokkonenki on alkanu kasvamhaan. Västäräkki, peippo ja räkättirastas ovat käyhneet pihala jo toista viikkoa syömässä ja naapurissa ensimäinen pääskyspari on nähty pari viikkoa sitte; mutta ei meilä silti vielä kesä ole, pohjosesta tuulee kylmästi ja viimeksi eilen visko lumia muutaman hiutalheen verran.

Porot on olheet taas talven kotiruokinassa ja viime viikon tiistaina löysäthiin methään pälviä hakehmaan. Muutama poro käypi vielä aian sisälä hakemassa sapuskaa, mutta vaatimet eli emät on menheet jo kauemas vasohmaan. Poro vassoo touko-kesäkuun vaihteessa, sanothaan että vasominen on tavalisena vuonna kiihvaimmilhaan toukokuun 20. päivän kiepheilä. Yksittäisiä vasoja on kuulemma jo syntyny, mutta itte en ole vielä yhthään nähny.